Excel VBA إكسيل فيجوال بيسك ابليكشن

Excel VBA إكسيل فيجوال بيسك ابليكشن

http://egyptiansabroad.org/vb/showthread.php?18101-Excel-VBA

Excel VBA إكسيل فيجوال بيسك ابليكشن

مش عارف في حد من إخوانا الماليين مهتم بالاكسيل و تطبيفات برمجة الفيجوال بيسك و لا لأ؟

بإذن الله هاخصص هذا الموضوع لتطبيققات الفيجوال بيسك في الميكروسوفت إكسيل لأهميتها لمستخدمي المعلومات المالية و الإقتصادية و المحاسبية و مين عارف يمكن يطلع من منتدانا هذا برنامج يكسر الدنيا..هاعتمد في الموضوع اعتماد كبير علي كتاب الفيجوال بيسك للمبتدئين لجون وكينباك و كتب و مقالات و هاحاول أذكر المصدر بقدر المستطاع.

و نبدأ بسم الله الرحمن الرحيم و الصلاة والسلام علي سيد المرسلين
هاعتمد في الموضوع علي استخدام مصطلحات و أساليب برمجة مبسطة تناسب المبتدئين و متوسطي الخبرة في استخدام الاكسيل و اللي ما عندهمش خبرة سابقة في البرمجة
هانستخدم و نتعرف علي معظم الأوامر المستخدمة في برمجة تطبيقات الفيجوال بيسك
الشرح هايعتمد علي استخدام الاكسيل 2007 يعني لو بتستخدم 2003 او اكس بي او 2000 فحمل الاكسيل 2007

ايه لازمه الفي بي ؟

مفيد جدا في الحصول علي وظائف لأن معظم بل كل الشركات بتشترط الموظف يكون بيعرف اكسيل و الفي بي ايه هو احد عناصر الاكسيل

هاتزيد انتجايتك و هاتخليك تنجز اشياء كانت بتاخد منك وقت طويل جدا في وقت اقل بكتير جدا

متعة (بتكلم بجد) في ناس مهوسين بامكانيات الاكسيل و الحاجات اللي ممكن يعملوها به و اللي مستحيل تتعمل من غيره

ايه بقي ال VBA ده؟

ده بعون الله إختصار لل Visual Basic Applications و هي لغة برمجة إخترعتها شركة ميكروسوفت بتاعة الراجل اللي هو اغني رجل في العالم و القصص اياها دي... و احسن تعريف للفيجوال بيسك هو انها زي رجل ألي تقوله يعمل ايه في المعلومات علي الاكسيل من تحليلها و عرضها و غيره و هو بيشتغل علي الاكسيل بسرعة رهيبة و منتهي الدقة ة علشان تديله المعلومات دي محتاج تديله اوامر و اكواد معينة اللي هي البرمجه اللي بنتكلم عنها و بعدين تسيبه و تروح تضرب واحد قهوة و ترجع يكون خلص الشغل كله... (في احلي من كده)

هانستفيد من ال VBA في ايه؟

بعض الامثلة علي الحاجات اللي ممكن نعملها من الفيجوال بيسك

اعداد قوائم بيانات زي اسماء العملاء و عنواينهم و الموردين الخ
اعداد موازنات و دراسات جدوي
تحليل بيانات علمية
عمل فواتير و قيود محاسبية
عمل رسومات بيانية من التقارير

و غيره حاجات تانية كتير جدا بس دي مجرد أمثلة لبعض الامكانيات و الاتي بعض الاستخدامات الشائعة للفي بي ايه

إدخال اسماء و عناوين بطريقة اوتوماتيكية.... يعني لو بتطبع فواتير مثلا بدل ما تقعد تكتب اسم الزبون و عنوانه و تليفونه بتحط أمر معين و بمجرد ما تدخل رقم العميل ال vba بيكتب لك المعلومات دي
تحديد مهام تتم بصفة منتظمة.... يعني مثلا المدير بتاعك بيحتاج تقرير معين يكون علي مكتبه في يوم معين تقوم تعمل له برنامج يستخرج التقرير ده و يبعته له في توقيت انت اللي تحدده بالثانية و طبعا المدير هايستكيف من دقتك في المعلومات و التوقيت و هايرقيك لشغلانة اكبر منها و ساعتها ما تنساش أخوك بكام دولار
برمجة عملية متكررة... فرضا مثلا محتاج تعيد نفس العملية في 12 ورقة اكسيل بسهولة بتحط امر و تقول له يعيد العملية مع نفسه
تحديد اوامر محددة... نفترض مثلا انك في تقرير معين بتحتاج كل مره تجمعه و تطرحة و تضربه الخ فممكن تختصر كل الكلام بزر معين و لما تضغط عليه الاكسيل هايفهم انت عايز تعمل ايه

كده خلصنا شوية الرغي اللي في الاول و يتبع إن شاء الله و مش هانطول هانخش في المفيد علي طول